Përplasja me armë në Prishtinë, ​vdes edhe i plagosuri i dytë (VIDEO)

Kosova dhe Shqipëria

Zyrtarë të QKUK-së kanë konfirmuar se ka ndërruar jetë edhe personi i dytë si pasojë e plagëve të marra gjatë të shtënave me armë zjarri sot në lagjen “Mati 1” në Prishtinë.

“Ka vdekur edhe personi i dytë, i cili përkundër përpjekjeve të mjekëve, për shkak të gjendjes së rëndë nuk ka arritur të mbijetojë”, tha zëdhënësi i QKUK-së, Shpend Fazliu.

Si pasojë e të shtënave me armë zjarri sot pasdite në rrugën “Muharrem Fejza” janë plagosur fillimisht katër persona, dy prej të cilëve tashmë kanë ndërruar jetë në QKUK.

Ndërkohë edhe dy persona tjerë të plagosur vazhdojnë të trajtohen në QKUK.

Policia nuk ka bërë të ditur zyrtarisht motivet e rastit, por sipas dëshmitarëve në konfliktin e armatosur janë përfshirë familjet Mehmeti dhe Rafuna, për shkak të kontestit pronësor.